French (Fr)GasconEspañolBasque
Friday, January 19, 2018

Las noùstẹs poumes – lou noùstẹ pèys

Lou noum de las noùstẹs poumes, Vasconià, que bién dou noùstẹ territòri de prouduccioû : la Gascougne, autescòp aperade Pèys bascoû ou Bascounie.

Entér las Landes, lou Bascoàt e lou Biarn, la Gascougne qu’éy lou matòc istourìc e gourmàn de l’Aquitàni. Subàn lous especialìstẹs (Evelyne Leterme e Jean-Marie Lespinasse, autoùs dou lìbẹ « Les Fruits retrouvés, patrimoine de demain » parescùt en mars 2008 en ço de las Éditions du Rouergue) « lou beryè de poumès bàscous qu’éy û dous méy biélhs d’Europe ». Qu’aberé prabàt au Bascoàt puch en toute la Gascougne permoù dou sabé-ha biengùt dous Roumâs entà embeudà e coutibà.

Tradicioûs gourmandes
Desempùch hère, la poume que hè partide de las tradicioûs de la noùstẹ regioû. Las cantes, lous coùntẹs e las coustumes de Gascougne que parlen soubén d’aquére frute. Autescòps, que hasèn atàu presén de nau poumes aus nòbis entà-us pourtà bounùr. Per las maysoûs, la poumade que regaudibe las tauleyades de familhe e l’arrasimàt de poumes qu’adoucibe lou pic dou roumàdyẹ d’aulhe hèyt p’ous aulhès.